PROXECTO DE DECRETO
SOBRE UN RÉXIME EXTRAORDINARIO DE RECOÑECEMENTO DO
DESENVOLVEMENTO PROFESIONAL DO PERSOAL ESTATUTARIO DAS
CATEGORÍAS DE LICENCIADOS SANITARIOS DO SERGAS PREVIO Á
IMPLANTACIÓN DO FUTURO RÉXIME DE DESENVOLVEMENTO PROFESIONAL A
QUE SE REFIRE A LEI 44/2003 DO 21 DE NOVEMBRO, DE ORDENACIÓN DAS
PROFESIÓNS SANITARIAS
A
primeira regulación xeral dun sistema de recoñecemento do
desenvolvemento profesional no eido das profesións sanitarias
recolleuse na Lei 44/2003, do 21 de novembro, de Ordenación das
Profesións Sanitarias.
A Lei
7/2003, do 9 de decembro de Ordenación sanitaria de Galicia e a
Lei 55/2003, do 16 de decembro, do Estatuto Marco do persoal das
institucións sanitarias do Sistema Nacional de Saúde refírense á
carreira profesional como o dereito dos profesionais a progresar
de forma individualizada, co recoñecemento do seu
desenvolvemento profesional en canto a coñecemento, experiencia
e cumprimento dos obxectivos da organización na que prestan os
seus servizos.
Asemade, o Estatuto Marco, prevé determinados efectos do dito
recoñecemento, introducindo un concepto retributivo -complemento
de carreira profesional- destinado a retribuír o grao acadado na
carreira profesional.
As
ditas previsións lexislativas impoñen as Administracións
sanitarias o desenvolvemento regulamentario do sistema de
recoñecemento do desenrolo profesional, co fin de que a
implantación do mesmo poida facerse real e efectiva en canto a
súa constancia pública -o recoñecemento público do nivel
profesional- ao aspecto retributivo, e á promoción deste persoal
conxuntamente coa mellor xestión das institucións sanitarias.
Porén,
a Lei 44/2003, de ordenación das profesións sanitarias e a Lei
55/2003, do Estatuto Marco ordena á Comisión de Recursos Humanos
do Sistema Nacional de Saúde a determinación dos principios e
criterios xerais para a homologación do recoñecemento do
desenvolvemento profesional, especialmente no relativo ás
denominacións dos distintos graos, aos sistemas de valoración
dos méritos, á composición dos graos acadados polos profesionais
dos distintos servizos de saúde, todo elo dirixido ao
recoñecemento mutuo, efectos profesionais e libre circulación
dos mesmos no conxunto do Sistema Nacional de Saúde. Na
actualidade a citada Comisión de Recursos Humanos está a
traballar na definición deses principios.
Asemade, a Lei 44/2003, de
ordenación das profesións sanitarias determina que as
Administracións sanitarias regularán o recoñecemento do
desenvolvemento profesional para os seus propios centros e
establecementos que, de conformidade co Estatuto Marco, deberán
ser negociados na Mesa Sectorial para a configuración dos
mecanismos da carreira profesional, con adaptación as condicións
e características organizativas, sanitarias e asistenciais do
servizo de saúde e dos seus centros.
No ámbito do Sergas, o Acordo
de mellora retributiva e profesional do persoal das institucións
sanitarias do Sergas asinado o 1 de outubro de 2003, cuxa
vixencia se estende para o persoal facultativo ata 2005 e para o
resto do persoal ata o 2006, previu, no seu punto 8 a regulación
dun sistema de carreira profesional.
A novidade da materia fai
complexo o seu tratamento, a súa definición e a configuración do
seu percorrido, toda vez que este sistema converterase nun dos
eixos para a mellora da calidade do servizo público e
instrumento de motivación do persoal. Doutra banda, o deseño do
sistema de recoñecemento debe adaptarse ás peculiaridades
intrínsecas á respectiva profesión ou colectivo. Xa que logo,
parece axeitado o tratamento diferenciado do sistema de
recoñecemento do desenvolvemento profesional dos diferentes
colectivos, co obxecto de deseñar un sistema que se adapte
realmente á realidade das distintas profesións.
Con carácter previo á
implantación dese futuro sistema, no que se establecerá o réxime
de avaliación a que se refire a Lei 44/2003 e de homologación,
de conformidade cos principios que determine o Consello
Interterritorial do Sistema Nacional de Saúde, neste decreto
abordase un sistema de recoñecemento previo do grao de
desenvolvemento para o persoal do Sergas que teña en conta o
nivel profesional dos mesmos e permita posteriormente a
axilización da transición ao acceso ao sistema definitivo de
recoñecemento profesional e carreira profesional.
No presente decreto regúlase
un procedemento excepcional ao que accederá o persoal fixo das
categorías sanitarias de titulados superiores do Sergas, aos que
lle posibilitará disfrutar do recoñecemento do seu
desenvolvemento profesional e dos efectos económicos á que se
refire o artigo 43 do Estatuto Marco, sen prexuízo do
desenvolvemento normativo dos sistemas para o resto das
categorías que serán obxecto de regulamentación e do
desenvolvemento normativo do Título III da LOPS.
No deseño do réxime que se
regula no presente decreto consideráronse dous aspectos que se
estiman importantes para a súa posta en marcha. En primeiro
lugar que o sistema de desenvolvemento profesional debe incidir
directa e positivamente na mellora do servizo público e da
atención ao cidadán. En segundo lugar, o sistema extraordinario
debe ter en consideración os parámetros que permitan no futuro a
homologación dos graos ao sistema que definitivamente se dicte
en desenvolvemento da Lei de Ordenación das Profesións
Sanitarias.
Xa que logo, o sistema
estructurase en catro graos. O acceso a estes graos é voluntario
para o profesional que deberá acreditar a experiencia
profesional mínima esixida para cada un deles.
Así mesmo, o sistema de
recoñecemento debe contemplar un réxime de avaliación do
profesional como criterio de acceso aos diferentes graos,
que por unha parte permita, cos instrumentos de que
actualmente se dispón, ter en conta a traxectoria do profesional
para a aplicación do réxime en atención aos méritos
recabados con anterioridade á súa entrada en vigor e, por outra
banda, facilitar a homologación ao futuro sistema de
recoñecemento do desenvolvemento profesional, baseado na
avaliación do profesional, unha vez que, determinados os
criterios de homologación polo Consello Interterritorial, se
proceda ao desenvolvemento do Título III da LOPS.
No que á realidade do persoal
procedente de réximes xurídicos distintos ao estatutario,
consideráronse as súas peculiaridades na regulación para o
acceso ao sistema de recoñecemento profesional en termos de
homoxeneidade.
Outorgase idéntico tratamento
aos casos parangonables tales como os servizos prestados
polo persoal funcionario ou laboral das institucións
transferidas á Comunidade Autónoma actualmente integrado no
réxime estatutario en virtude dos procesos de homologación.
Para o persoal de cota e zona
prevese o recoñecemento dun grao inicial, que o sitúa na
posición xurídica axeitada para que poida acceder ao sistema
regulado no presente decreto.
No caso do persoal
especialista de cota demórase a entrada en vigor do sistema ao
remate dos procesos de xerarquización en virtude dos cales se
situarán en condicións de igualdade para o acceso a este sistema
de recoñecemento.
Por último, nos supostos de
persoal funcionario e laboral, das institucións sanitarias
adscritas á Consellería de Sanidade que non tivese oferta de
integración no réxime estatutario, demórase ata o remate dos
procesos de homologación, a aplicación do sistema de
recoñecemento profesional.
O presente texto foi obxecto
de negociación na Mesa Sectorial do persoal das institucións
sanitarias do Servicio Galego de Saúde e acordo coas
organizacións sindicais CIG, CEMSATSE, CC.OO, CSI-CSIF e UGT,
representadas na mesma.
Asemade o presente texto
someteuse a audiencia das organizacións colexiais dos ámbitos
profesionais a que atinxe o presente decreto.
Por todo o que antecede,
previa aprobación polo Consello da Xunta de Galicia a proposta
da Consellería de Sanidade,
DISPOÑO:
Artigo primeiro.- Obxecto
A presente norma ten por
obxecto:
A. Regular un sistema
extraordinario de recoñecemento do desenvolvemento profesional,
previo á implantación do futuro réxime de desenvolvemento
profesional a que se refire a Lei 44/2003 do 21 de novembro, de
Ordenación das Profesións Sanitarias, consistente na
determinación do nivel profesional acadado polo persoal
estatutario fixo das categorías sanitarias de titulados
superiores do Sergas que reúna os requisitos a que se refire o
artigo quinto desta norma, para os efectos do seu encadramento
nos distintos graos recollidos no artigo cuarto.
B. Introducir o complemento
retributivo de carreira profesional previsto no artigo 43.e da
lei 55/2003 de 16 de decembro, Estatuto Marco do persoal
estatutario dos servizos de saúde, no réxime retributivo do
persoal das respectivas categorías do Servizo Galego de Saúde.
Artigo segundo.- Principios xerais
O sistema extraordinario de
recoñecemento previo do desenvolvemento profesional a que se
refire o presente decreto configúrase con base nos seguintes
principios:
a)
Principio de voluntariedade: a
participación neste sistema será voluntaria para o persoal
comprendido no ámbito de aplicación e só procederá a instancia
do interesado.
b)
Principio de personalidade: o
recoñecemento do grao terá carácter persoal e individual e
realizarase en consideración aos méritos aportados polo
interesado.
c)
Principio de gradualidade: A
determinación do nivel profesional se realizará nos graos que se
definen no presente decreto.
d)
Principio de progresividade: O acceso
aos diferentes graos do recoñecemento previo do
desenvolvemento profesional será progresivo e sucesivo, de tal
xeito que o acceso ao grao superior só se realizará previa
acreditación do recoñecemento do grao inmediatamente inferior.
e)
Principio de mérito e competencia
profesional: O sistema extraordinario de recoñecemento do
desenvolvemento profesional baséase na experiencia, competencia
e contribución do profesional aos obxectivos da organización e
da mellora do servizo público que será avaliada de conformidade
con establecido no presente decreto.
f)
Principio de excepcionalidade: O
sistema regulado no presente decreto ten carácter excepcional e
será de aplicación por unha soa vez aos profesionais
comprendidos no seu ámbito de aplicación, sen prexuízo da
implantación do futuro réxime que se dicte en desenvolvemento do
título terceiro da Lei 44/2003, do 21 de novembro.
g)
Principio de irreversibilidade: Aos
efectos do previsto no presente decreto, o grao recoñecido a un
profesional terá carácter persoal, irreversible e consolidable
no ámbito do Sergas. A norma que regule o ulterior proceso de
homologación ao abeiro do artigo 39 da Lei 44/2003, do 21 de
novembro de ordenación das profesións sanitarias establecerá as
condicións de equiparación e recoñecemento cos graos que se
regulen, de se-lo caso.
Artigo terceiro.- Ámbito de aplicación
Poderá
acceder ao sistema previo de recoñecemento do desenvolvemento
profesional, nos prazos que se determinan no presente decreto:
a)
O persoal estatutario fixo e con praza en
propiedade nos equipos das institucións sanitarias do Sergas, á
entrada en vigor do presente decreto, non incluído nos apartados
b), c) e d), pertencente ás categorías de licenciados con título
de especialista en Ciencias da Saúde e licenciados sanitarios
das actuais categorías sanitarias.
b)
O persoal estatutario pertencente ás categorías
de licenciados con título de especialista en Ciencias da Saúde e
licenciados sanitarios, que obteña a condición de fixo e praza
en propiedade das actuais categorías sanitarias nunha
institución sanitaria do Sergas, con ocasión do remate dos
procesos executados ao abeiro da Lei 16/2001, e tome posesión da
mesma nos prazos indicados na resolución que poña fin aos
mesmos.
c)
O persoal fixo de cota e zona e con praza en
propiedade, á entrada en vigor deste decreto, pertencente
ás categorías de licenciados con título de especialista en
Ciencias da Saúde e licenciados sanitarios, de conformidade co
previsto no réxime específico que se determine en atención a súa
singularidade.
d)
O persoal estatutario fixo especialista de cota e
con praza en propiedade, á entrada en vigor deste decreto, de
conformidade co previsto na disposición adicional terceira.
Artigo cuarto.- Estructura do sistema previo de
recoñecemento do desenvolvemento profesional
1. O
sistema previo de recoñecemento de desenvolvemento profesional
estructurase en catro graos; para cuxo acceso será preciso ter
completados, en xornada ordinaria, os períodos de servizos
prestados que se detallan neste parágrafo, como persoal
estatutario, na mesma categoría ou especialidade, nas
institucións sanitarias do Sistema Nacional de Saúde:
Grao
I: 5 anos
Grao
II: 12 anos
Grao
III: 18 anos
Grao
IV: 23 anos
2. Para os efectos do cómputo
dos servizos prestados, que se refiren no parágrafo anterior,
non se entenderan incluídos os servizos como especialista
en formación e os prestados con nomeamento de atención
continuada ou nomeamento de gardas médicas.
3. Os servizos prestados
como persoal funcionario ou laboral nas institucións sanitarias
traspasadas ao Servizo Galego de Saúde, polo persoal integrado
no réxime estatutario en virtude dos procesos de homologación
tramitados polo Sergas, considéranse como prestados nas
institucións sanitarias do Sistema Nacional de Saúde para
os efectos do previsto no parágrafo primeiro.
Artigo quinto.- Acceso ao
sistema previo de recoñecemento do desenvolvemento profesional.
Requisitos
1. O recoñecemento previo do
grao de desenvolvemento profesional regulado no presente decreto
realizarase, a instancia do interesado presentada nos prazos que
se determinen.
2. O recoñecemento do dito
grao será progresivo, sendo necesario para acceder a un grao
superior acreditar o recoñecemento do grao inmediatamente
inferior
3. Na data dos efectos aos
que se refire o artigo oitavo, para acceder ao recoñecemento de
grao, os profesionais deberán cumprir ou estar en condicións de
cumpri-los requisitos seguintes:
a)
Ostentar a condición de persoal
estatutario fixo da correspondente categoría ou especialidade,
con praza en propiedade nas institucións sanitarias do Sergas.
b)
Tempo de experiencia profesional na
mesma categoría ou especialidade a que se refire o artigo
anterior para cada grao.
c)
Estar en situación de activo ou
asimilada, de conformidade co establecido na Lei 55/2003, de 16
de decembro, do Estatuto marco, no intre da solicitude.
d)
Ter participado, nos cinco exercicios
inmediatamente anteriores á data da solicitude, nos obxectivos
asistenciais, reflectidos nos programas especiais do complemento
de productividade variable da institución do Sergas na que
estivese prestando servizos , e acreditar o seu
cumprimento nun 70% en cada un dos cinco exercicios ou nun 75%
de promedio nos ditos exercicios, sen prexuízo do disposto na
disposición adicional cuarta. Dita acreditación realizarase
mediante certificación do director xerente do centro de que se
trate de conformidade coa avaliación efectuada.
e)
Ter acreditado o grao inmediatamente
inferior ao solicitado, para os casos do grao II e sucesivos
f)
No caso de persoal de cota e zona, ter
acreditado o grao inicial á que se refire a disposición
adicional primeira e superar o procedemento de avaliación da súa
integración funcional no equipo de atención primaria
g)
Presentar solicitude de recoñecemento
do desenvolvemento profesional en tempo e forma.
h)
Os que específicamente se establezan
na norma que regule o acceso ó sistema de recoñemento nos
supostos das disposicións adicionais terceira e sexta
Artigo sexto.- Efectos do
recoñecemento
O
recoñecemento do desenvolvemento profesional outorgará aos
profesionais os seguintes dereitos:
a)
A súa constancia para os efectos do
currículo.
b)
A acceder ao grao superior sempre que
se acrediten os demais requisitos esixidos.
c)
O abono do complemento de carreira na
contía correspondente o grao de encadramento.
Sen
prexuízo do disposto na disposición adicional sétima do presente
decreto, dito recoñecemento non suporá o encadramento automático no
réxime que se regule en desenvolvemento do título terceiro da Lei
44/2003, de Ordenación das Profesións Sanitarias, o cal preverá as
condicións de homologación, avaliación encadramento e
equiparación, que de se-lo caso, corresponda aplicar para o
recoñecemento dos graos que se regulen, nos termos de homologación
previstos para o Sistema Nacional de Saúde .
Artigo
sétimo.- Complemento de carreira
Establécese o complemento de carreira, destinado a
retribuír o grao recoñecido, como retribución complementaria de
carácter fixo.
As contías anuais a percibir por este complemento,
devengaranse en 12 mensualidades, a razón de 3000 €/ano por nivel
recoñecido:
|
Graos |
Contía por grao
|
Valor
acumulado |
|
Grao I |
3000 €/ano |
3000 €/ano |
|
Grao II |
3000 €/ano |
6000 €/ano |
|
Grao III |
3000 €/ano |
9000 €/ano |
|
Grao IV |
3000 €/ano |
12000 €/ano |
Artigo
oitavo.- Desenvolvemento do sistema
A
implantación do sistema de recoñecemento dos diferentes graos
realizarase nunha única vez e nun único procedemento no ano de
efectividade para cada un dos graos e colectivos, referidos no
artigo terceiro.
De
conformidade co disposto no parágrafo anterior, o recoñecemento do
grao de desenvolvemento profesional realizarase coa seguinte
secuencia:
a)
O persoal estatutario fixo con praza en
propiedade nos equipos das institucións sanitarias do Sergas, á
entrada en vigor do presente decreto, non incluído nos parágrafos b)
e c), pertencente ás categorías de licenciados con título de
especialista en Ciencias da Saúde e licenciados sanitarios,
das actuais categorías sanitarias, que cumprise os requisitos a que
se refire o artigo quinto, poderá acceder aos sucesivos graos cos
seguintes efectos:
·
Grao I: Efectos de xullo
de 2005
·
Grao II: Efectos de xullo
de 2006
·
Grao III: Efectos de xullo
de 2007
·
Grao IV: Efectos de xullo
de 2008
b)
O persoal estatutario fixo pertencente ás
categorías de licenciados con título de especialista en Ciencias da
Saúde e licenciados sanitarios que obteña praza en propiedade das
actuais categorías sanitarias nunha institución sanitaria do Sergas,
con ocasión do remate dos procesos executados ao abeiro da Lei
16/2001, e tome posesión da mesma nos prazos indicados na resolución
que poña fin aos mesmos, que cumprise os requisitos a que se
refire o artigo quinto, poderá acceder os sucesivos graos cos
seguintes efectos:
·
Grao I: Efectos de xullo
de 2006
·
Grao II: Efectos de xullo
de 2007
·
Grao III: Efectos de xullo
de 2008
·
Grao IV: Efectos de xullo
de 2009
c)
O persoal estatutario fixo con praza en
propiedade, á data da entrada en vigor do presente decreto, de cota
e zona,
que cumprise os requisitos previstos no artigo
quinto, pertencente á categorías de licenciados con título de
especialista en Ciencias da Saúde e licenciados sanitarios:
·
Grao I: Efectos segundo a
disposición adicional primeira
·
Grao II: Efectos de
xaneiro de 2007
·
Grao III: Efectos de
xaneiro de 2008
·
Grao IV: Efectos de
xaneiro de 2009
Artigo noveno.- Procedemento de
recoñecemento do grao de desenvolvemento profesional
1. O
recoñecemento do grao de desenvolvemento profesional a que se refire
o presente decreto realizarase mediante resolución do director xeral
de Recursos Humanos, previo informe do director xeral de Asistencia
Sanitaria.
Na
resolución que se dicte, que porá fin á vía administrativa
especificarase o grao acadado e os seus efectos así como os medios
de impugnación que caiba interpoñer contra a mesma.
2. Con anterioridade á data da efectividade á que se
refire o artigo anterior por Resolución da División de Recursos
Humanos do Sergas abrirase o prazo para a presentación das
instancias polos profesionais.
O profesional deberá presentar solicitude no seu
centro de traballo no citado prazo, acompañándoa da acreditación do
cumprimento dos requisitos esixidos ou de estar en condicións de
cumprilos na data de efectos a que se refire o artigo anterior, para
o acceso a cada un dos graos.
3. As solicitudes serán resoltas nos tres
meses seguintes á finalización do prazo para a súa presentación. A
falta de resolución entenderanse desestimadas.
Habilítase á da División de Recursos Humanos do
Sergas a establecer, se é o caso, o procedemento de solicitude e as
condicións para a súa avaliación, previa negociación na Mesa
sectorial.
Disposición adicional primeira
1. O
persoal de cota e zona poderá acceder ao sistema previo de
recoñecemento do desenvolvemento profesional nos termos previstos na
presente disposición.
2.1. Con
anterioridade ao encadramento no grao 1 do sistema extraordinario
que se regula no presente decreto, o persoal de cota e zona deberá
ter recoñecido o pre-grao que se establece na presente
disposición.
2.2. O
recoñecemento deste grao inicial outorgará ao profesional o dereito
a percibir un complemento de carreira pre-grao, de caracter fixo e
persoal que ascenderá á contía de 3000 €/ano, que se devengará en
doce mensualidades.
Os efectos
económicos do citado recoñecemento terán vixencia dende xaneiro de
2006.
2.3.
Poderá acceder ao pre-grao o persoal estatutario fixo de cota e
zona, das categorías de licenciados sanitarios, sempre que o
soliciten e reúnan os requisitos seguintes:
·
Ostentar a condición de
persoal fixo das categorías de licenciados sanitarios de cota e
zona, con praza en propiedade nunha institución sanitaria do Servizo
Galego de Saúde.
·
Acreditar, alomenos, cinco
anos de servizos prestados en praza de cota e
zona, nunha institución sanitaria do Sergas.
·
Estar en situación de
activo ou asimilada, nos termos do Estatuto Marco, no intre da
solicitude.
·
Instar a integración
funcional no equipo de atención primaria do centro de destino.
·
Presentar a solicitude de
recoñecemento do grao inicial en tempo e forma.
2.4. O
procedemento de integración funcional e os seus efectos regularanse
por Orde da Consellería de Sanidade, previa negociación no seo de
Mesa sectorial.
A
integración funcional do persoal de cota e zona, que suporá a súa
incorporación funcional ao novo modelo de atención primaria en
termos de xornada, horario e participación na actividade asistencial
propia do equipo de atención primarían no que se integren, non
determinará a modificación do seu actual réxime xurídico e
retributivo.
A
solicitude de integración funcional terá carácter irreversible e
irrenunciable para o interesado.
2.5.
No derradeiro trimestre do ano 2005, a División de Recursos Humanos
do Sergas abrirá o prazo de presentación de instancias para o
recoñecemento do pre-grao. No citado prazo os interesados deberán
presenta-la súa instancia acompañada da documentación que acredite
os requisitos referidos no parágrafo anterior.
A
tramitación e resolución das ditas solicitudes corresponderá á
División de Recursos Humanos do Sergas.
A
resolución, que porá fin á vía administrativa, indicara o grao
inicial recoñecido, os efectos económicos e a data da súa entrada en
vigor, así como os recursos que contra a mesma caiba interpoñer.
3.1. No derradeiro trimestre do ano 2006, a
División de Recursos Humanos abrirá o prazo para a presentación das
solicitudes de recoñecemento do grao 1, a que se refire o artigo
quinto do presente decreto.
Na resolución estableceranse os criterios que
deberán ser empregados para a avaliación da integración funcional do
persoal que tivera optado pola mesma, previa á súa negociación en
Mesa sectorial. En todo caso os citados criterios recollerán a
valoración sobre a participación efectiva do profesional na
actividade asistencial e prestacional propia da unidade ou servizo
nos que se tivese integrado.
3.2. Poderá acceder ao citado recoñecemento o
persoal que reúna os requisitos a que se refire o artigo quinto
deste decreto.
3.3. O complemento de carreira que se devengue polo
recoñecemento do grao 1 absorberá o complemento de carreira
pre-grao.
4. A Administración sanitaria promoverá a
adaptación da normativa vixente co fin de que o acceso ao dereito de
recoñecemento do grao de desenvolvemento profesional poida facerse
real e efectivo nos prazos establecidos para o persoal de cota
e zona.
Disposición adicional segunda
O
recoñecemento previo do grao de desenvolvemento profesional do
persoal especialista de cota estará suxeito á súa xerarquización.
A disposición que regule o réxime de xerarquización
determinará os requisitos, sistema de avaliación, alcance e
efectividade do réxime de acceso ao recoñecemento previo do
desenvolvemento profesional para este persoal, previa á súa
negociación no seo da Mesa sectorial, en termos parangonables ao
resto do persoal, tendo en conta as peculiaridades do seu réxime de
prestación de servizos.
Disposición adicional cuarta
1. Quedan exceptuados da
acreditación do requisito ao que se refire o apartado 3.d do artigo
5º os períodos de tempo nos que o persoal permanecese nalgunha das
seguintes situacións:
a)
situación de excedencia forzosa a que se
refiren os artigos 11.1 e 11.3 e 13 do derrogado Estatuto xurídico
do persoal médico da Seguridade Social aprobado polo Decreto
3160/1966, do 23 de decembro.
b)
situación de excedencia especial en
activo, a que se refire o artigo 13 do derrogado Estatuto xurídico
do persoal médico da Seguridade Social, aprobado polo Decreto
3160/1966, do 23 de decembro.
c)
situación de servizos especiais a que se
refire o artigo 64 da Lei 55/2003 do 16 de decembro do Estatuto
marco do persoal estatutario dos servizos de saúde.
d)
os períodos de disfrute de permisos
sindicais.
e)
Excedencia por coidado de familiares.
f)
Licencia por maternidade, incapacidade
temporal e comisión de servizos.
2. Cando razóns organizativas impidan a un
profesional acreditar a súa participación nos programas de
obxectivos do complemento de productividade variable, quedará
exonerado do requisito a que se refire o parágrafo 3.d) do artigo
quinto. Porén, o xerente do centro emitirá certificación
acreditativa deste extremo así como informe detallado da súa
participación nos obxectivos asistenciais, de conformidade coas
instruccións da División de Recursos Humanos.
3. Cando un profesional non incluído nos dous
parágrafos anteriores, non puidese acreditar o cumprimento o
requisito a que se refire o apartado 3 d) do artigo 5, a Comisión
Técnica de Avaliación poderá informar favorablemente a solicitude
dun interesado á vista, entre outros aspectos, do currículo docente
e investigador, sempre e cando as ditas actividades fosen alleas ao
programa de obxectivos da CPV e se apreciase nas mesmas un interese
redundante na mellora do servizo asistencial da institución ou do
Sergas, así como das peculiaridades do centro ou institución na que
prestase servizos que fosen determinantes e diferenciadoras da
actividade asistencial desenvolvida polo profesional, de tal xeito
que non puidese ser avaliada nos termos previstos nos parágrafos
anteriores desta disposición.
Disposición adicional quinta
1. Crease a Comisión Técnica de Avaliación, de
carácter paritario, integrada por un representante designado por
cada unha das organizacións sindicais da Mesa Sectorial e idéntico
número de membros designados pola Administración, exercendo a
presidencia un representante da División de Recursos Humanos do
Sergas.
2. Corresponde á Comisión Técnica de Avaliación
informar aquelas solicitudes de recoñecemento de grao que non
cumpran os requisitos á que se refire o apartado d) do parágrafo
terceiro do artigo 5 e estean nalgún dos supostos recollidos na
disposición adicional cuarta.
3. Os acordos serán adoptados por maioría dos seus
membros.
Disposición adicional sexta
1. O persoal funcionario
ou laboral fixo, na data de entrada en vigor do presente decreto,
das institucións sanitarias actualmente adscritas á Consellería de
Sanidade poderá acceder, por única vez, ao sistema extraordinario
que se regula no intre en que se abra o primeiro proceso de
integración ao réxime estatutario trala súa promulgación.
A norma que regule a
citada integración determinará os requisitos, sistema de avaliación,
alcance e efectividade do réxime de acceso ao recoñecemento previo
do desenvolvemento profesional para este persoal, previa á súa
negociación no seo da Mesa sectorial.
2. Para os efectos do disposto no parágrafo
anterior, resolta a integración abrirase o procedemento para o
recoñecemento previo do nivel de desenvolvemento profesional do
persoal que tivese optado pola súa integración no réxime
estatutario.
Disposición adicional sétima
O réxime
de recoñecemento do desenvolvemento profesional a que se refire o
título terceiro da Lei 44/2003 do 21 de novembro, será negociado na
Mesa sectorial.
A norma
que regule o citado réxime preverá a definición dos graos
profesionais, procedemento para o seu recoñecemento, requisitos e
sistema de avaliación dos profesionais.
Así mesmo,
determinará o réxime de homologación dos graos que os profesionais
teñan acadados en virtude da aplicación do presente decreto, para os
efectos do recoñecemento dos graos que se establezan na citada
norma, de conformidade cos criterios que se acorden polo Consello
Interterritorial do Sistema Nacional de Saúde.
Disposición final
O presente decreto entrará en
vigor no prazo dos vinte días seguintes ao da súa publicación no
Diario Oficial de Galicia
|
