Transmenu powered by JoomlArt.com - Mambo Joomla Professional Templates Club

Recibimos do SERGAS a seguinte mensaxe, que anuncia a publicación das listas automáticas de xullo provisionais:

Mañán,  martes día 7 de setembro, publicaranse as listas provisionais nas categorías de Persoal Médico de Familia, Puericultor/a, Persoal Médico de Urxencias Hospitalarias, Pediatra, Matrón/a,Cociñeiro/Cociñeira, e Persoal de Enfermería (DUE), todos eles relativos á convocatoria automática de 1 de xullo de 2010.

Remítennos desde o SERGAS a seguinte mensaxe clarificatoria sobre os traslados e a OPE de Psiquiatría:

Como sabedes, desde a CIG remitiuse un escrito dirixido á "Defensora del Pueblo" sobre os recortes salariais ao funcionariado e a posibilidade de que esta entidade interpuxera un recurso de inconstitucionalidade sobre os mesmos. Velaqui temos a resposta: non van facer tal. Os argumentos que dan para non facelo podedes velos xunto co resto do contido da resposta aqui .

Sae hoxe publicado no DOG un anuncio de licitación para a contratación do servizo de atención telefónica de Cita Previa de Atención Primaria do SERGAS, e faino por un montante de 1.950.000 euriños de nada para un período dun ano, ou sexa, dous millóns para contratar unha empresa privada que se encargue de xestionar durante un ano (iso si, con dereito á prórroga, con máis euriños de por medio) as chamadas para petición de cita previa que, por rebosamento (posto que a intención do SERGAS é voltar a cita previa aos centros, é dicir, ao xa polisaturado persoal administrativo e de servizos xerais), se produzan.

En qué se traduce isto? En que a administración da señora Farjas e a súa mal chamada "austeridade" van dilapidar 2 millóns de euros en cambiar a empresa adxudicataria  dun servizo que debería ser totalmente público, modificando ademais as condicións, posto que retornan a cita previa aos centros de saúde, precarizando máis as condicións de traballo do persoal que atende esas chamadas e deixando exclusivamente para a xestión da empresa as chamadas que se produzan por rebosamento, é dicir, aquelas que se produzan nos momentos en que @s PSX e Aux. Administrativos non sexan capaces de atender todo o traballo que teñen enriba e atender ademais o teléfono.

Para isto precisan regalar 2 millóns a unha empresa privada? Tendo en conta ademais que a plataforma informática necesaria para a xestión das chamadas é propia do SERGAS e que xa viña funcionando coa anterior empresa, quizais esa cantidade é excesiva, non? Acusan @s traballadores de magastar os cartos públicos, suspenden os acordos retributivos, reducen os salarios, racanean nas substitucións... pero para pagarlle a empresas alleas por servizos que ben se poderían facer desde a pública, hai millóns a esgalla.

Con eses dous millóns de euros poderíanse contratar uns 140 PSX para aliviar as xa de por sí abondosas cargas d@s actuais ou, tal e como esixía e esixe CIG-Saúde desde hai moito tempo, levar a cabo a contratación deste persoal estatutario para facer ese servizo desde o propio SERGAS, centralizando as chamadas nun número de teléfono que sería atendido por persoal da administración pública. É dicir: unha central de chamadas pública, útil, que funcione as 24 hs do día os 365 días do ano e que libere das excesivas cargas de traballo e da precarización ao actual persoal dos centros de saúde. Moito máis racional e austero que o método empregado pola señora Farjas, non?

Parece ser que se vai publicar en DOG unha nova corrección de erros da resolución de convocatoria dos traslados, exclusivamente para "arranxar" a denominación de dúas prazas de resultas de pediatría. Non sabemos se se vai aproveitar a corrección para enmendar esoutros erros que se nos foron facendo chegar. O correo que recibimos de Recursos Humanos non o indica. O seu texto é o seguinte:

Bos dias,
enviamos a DOG (esperamos a publicación para principios da próxima semana) una nova corrección de erros sobre duas resultas de pediatria, en concreto:
- a praza de  pediatra de Curtis (la praza sale a resultas Curtis mañana) modificase, saindo Curtis-Teixeiro-Sobrado-Vilasantar (como en realidade a ten o propietario)
- identica situación pasa coa resulta de Carballo que sae como resulta de Carballo mañá, cando en realidade o propietario é Carballo-Malpica mañá.

estas dúas correccións son imprescindibles para que no moemnto de adxudicar a posible resulta non se ocasionen problemas asistencias graves, por este motivo publicamos a corrección.

Perdoade por os inconvintes que esto poda xerar.
Un saúdo

Recibimos documentos de contestación do SERGAS a cadanseu escrito remitido por CIG-SAÚDE. O primeiro escrito fai referencia á colexiación de Hixienistas Dentais e a contestación é esta.

O segundo escrito foi o que enviamos recentemente sobre os erros na resolución de traslados e o uso de topónimos deturpados, ao que responden deste xeito, recoñecendo mesmo que levan anos utilizando topónimos ilegais inda que falan dun "erro puntual".

Diante das informacións publicadas hoxe en diversos medios sobre os concertos que a Consellaría de Sanidade está a facer con clínicas privadas para a derivación das Interrupcións Voluntarias do Embarazo, e baseándose a Consellaría nunha suposta "obxección de conciencia masiva" que seica impide que haxa profesionais que poidan realizar esta tarefa, enviamos o seguinte escrito á Conselleira esta mañá:

Pilar Farjas Abadia.

Conselleira de Sanidade.

Ante as informacións publicadas no día de hoxe en diversos medios de comunicación sobre os concertos con clínicas privadas que se están a levar a cabo desde esta Consellaría para derivar a éstas as Interrupcións Voluntarias do Embarazo que poidan requerirse ao abeiro da nova Lei, parece ser que segundo esta Consellaría necesarios ante a que parece unha “masiva” acollida á obxección de conciencia por parte dos/das profesionais, desde CIG-Saúde queremos manifestar:

1. O que parece ser un acollemento en masa á obxección de conciencia por parte do persoal do SERGAS non deixa de ser unha manifestación desta Consellaría da que non temos constatación oficial, posto que en ningún momento se teñen posto enriba da mesa datos obxectivos nos que se aprecie tal actitude por parte dos/das profesionais da Sanidade Pública. Amais, se a información desta numerosa obxección de conciencia emana do cuestionario que dun xeito prácticamente “secreto” se remitiu no seu día aos/ás traballadores/as, gustaríanos lembrarlle que  CIG-Saúde solicitou reiteradamente na Mesa Sectorial celebrada o pasado  20 de xullo que se nos informase do contido dese cuestionario, estando inda agardando por esta información. Deste xeito, existe un escurantismo sobre os contidos do cuestionario e tamén do proceso que se seguiu para realizalo que indica claramente por unha banda, un ánimo de terxiversar os verdadeiros datos da obxección de conciencia, e pola outra, ocultar un intento de “coaccionar” ou “dirixir” dalgún xeito as respostas do persoal interino, que sinte perigar as súas condicións laborais se non resposta o que se pretende que resposte.
2. Desde CIG-Saúde denunciamos unha vez máis o afán privatizador desta Conselleira, que baseándose en informacións que son descoñecidas públicamente e que non foron contrastadas, concerta con clínicas privadas servizos que deberían ser ofertados nos hospitais públicos, canto máis en temas tan delicados como o da Interrupción do Embarazo, demonizando deste xeito non só á Sanidade Pública e aos/ás seus/súas profesionais, senón tamén a Lei de Saúde Sexual e Reproductiva e da Interrupción Voluntaria do Embarazo e a aquelas pacientes que deciden facer uso dela.
3. Esiximos unha vez máis que se nos remita o contido do cuestionario enviado ás/aos profesionais, así como os “resultados” obtidos. Do mesmo xeito, emprazamos á señora Conselleira a que oferte nos centros públicos este servizo e que non se ampare en informacións ocultas e falseadas para, máis unha vez, poñer en mans privadas servizos que debería ser 100% públicos. Faino ademais, conseguindo unhas “rebaixas” que se nos queren vender coma se foran un aforro, cando en realidade existen servizos e profesionais na Sanidade Pública que poderían realizar estas IVE sen que tiveramos que pagar prebendas de ningún tipo a empresas privadas.

Agardando a súa resposta, atentamente:

Compostela, 13 de agosto de 2010.

Executiva Nacional CIG-Saúde.